શીતલ ઠાકર,ગાંધીનગર
ડિજિટલ યુગમાં બાળકોમાં મોબાઈલ ફોનનો વધતો વપરાશ હવે ગંભીર સામાજિક પ્રશ્ન બની રહ્યો છે. નાની ઉંમરે લાંબા સમય સુધી મોબાઈલ પર સમય પસાર કરવાથી બાળકોના અભ્યાસ પર અસર પડી રહી છે તેમજ આંખો, માનસિક સ્વાસ્થ્ય અને દૈનિક જીવનશૈલી પર પણ નકારાત્મક અસર જોવા મળી રહી છે.
શિક્ષણવિદો અને આરોગ્ય નિષ્ણાતોના જણાવ્યા અનુસાર અતિશય સ્ક્રીન ટાઈમના કારણે બાળકોમાં ધ્યાન કેન્દ્રિત કરવાની ક્ષમતા ઘટી રહી છે અને ચિડચિડાપણું વધતું જાય છે. મોબાઈલનો વધતો વપરાશ બાળકોને ખેલકૂદ, વાંચન અને સામાજિક પ્રવૃત્તિઓથી દૂર કરી રહ્યો છે.
બાળકોના સર્વાંગી વિકાસ માટે મોબાઈલનો મર્યાદિત અને નિયંત્રિત ઉપયોગ અનિવાર્ય બન્યો હોવાનું માનવામાં આવી રહ્યું છે. ઘર, શાળા અને સમાજે મળીને બાળકોને સંતુલિત ડિજિટલ જીવનશૈલી તરફ દોરવાની જરૂરિયાત પર ભાર મૂકવામાં આવી રહ્યો છે.
