અસત્ય પર સત્યના વિજયના પ્રતીક સમાન વિજયાદશમી (દશેરા)ના પર્વની સાબરકાંઠા જિલ્લાના મુખ્ય મથક હિંમતનગરમાં ભારે ઉત્સાહ અને શ્રદ્ધાપૂર્વક ભવ્ય ઉજવણી કરવામાં આવી હતી. વિશ્વ હિન્દુ પરિષદ (VHP) અને વિજયાદશમી ઉત્સવ સમિતિના સંયુક્ત ઉપક્રમે દર વર્ષની પરંપરા મુજબ આ વર્ષે પણ શહેરમાં એક ભવ્ય શોભાયાત્રાનું આયોજન કરવામાં આવ્યું હતું.
છાપરિયા સ્થિત શ્રી રામજી મંદિરથી પ્રસ્થાન થયેલી આ શોભાયાત્રા શહેરના મુખ્ય માર્ગો પર ફરી હતી. શોભાયાત્રામાં વિવિધ હિન્દુ સંગઠનોના હોદ્દેદારો, કાર્યકરો, યુવાનો તથા ગ્રામ્ય વિસ્તારોમાંથી આવેલા મોટી સંખ્યામાં શ્રદ્ધાળુઓ જોડાયા હતા. સમગ્ર માર્ગ પર વિવિધ વેપારીઓ અને સામાજિક અગ્રણીઓ દ્વારા શોભાયાત્રાનું ઉષ્માભર્યું સ્વાગત કરવામાં આવ્યું હતું.
સામાજિક સમરસતા અને શસ્ત્રકળાનું આકર્ષણ
શોભાયાત્રા દરમિયાન ટાવર ચોક ખાતે એક વિશેષ અને પ્રેરણાદાયી દ્રશ્ય સર્જાયું હતું, જ્યાં સામાજિક સમરસતાના સંદેશ સાથે અનુસૂચિત જાતિના બંધુઓ દ્વારા ભગવાન શ્રીરામની ભાવપૂર્વક આરતી કરવામાં આવી હતી. આ ઉપરાંત, શોભાયાત્રામાં વિવિધ સંગઠનો દ્વારા પરંપરાગત શસ્ત્રકળાનું અદભુત પ્રદર્શન યોજાયું હતું. જેમાં ખાસ કરીને વિશ્વ હિન્દુ પરિષદની યુવતીઓએ રજૂ કરેલી સાહસિક તલવારબાજી અને શસ્ત્ર કૌશલ્યે ઉપસ્થિત સહુ કોઈનું ધ્યાન આકર્ષિત કર્યું હતું.
હાથમતી નદીના કિનારે આતશબાજી સાથે રાવણદહન
શોભાયાત્રાના સમાપન બાદ હાથમતી નદીના કિનારે આવેલ મેદાનમાં ૩૫ ફૂટ ઊંચા રાવણના પૂતળાનું દહન કરવામાં આવ્યું હતું. રાવણદહનની ક્ષણે અદભુત આતશબાજી કરવામાં આવી હતી, જેનાથી સમગ્ર આકાશ અને વિસ્તાર ઝગમગી ઊઠ્યા હતા. આ ભવ્ય અને રોમાંચક નજારો નિહાળવા માટે હિંમતનગર શહેર તેમજ આસપાસના ગ્રામ્ય વિસ્તારોમાંથી હજારોની સંખ્યામાં નગરજનો અને શ્રદ્ધાળુઓ ઉમટી પડ્યા હતા. આમ, હિંમતનગરમાં દશેરાનો તહેવાર ભારે ઉત્સાહ, શ્રદ્ધા અને સમરસતાના વાતાવરણમાં સંપન્ન થયો હતો.
