ગુજરાત પ્રાણી કલ્યાણ બોર્ડ, ગાંધીનગરની સૂચનાઓ અને ગુજરાત હાઈકોર્ટના આદેશોના અમલીકરણના ભાગરૂપે તાપીના અધિક જિલ્લા મેજિસ્ટ્રેટ આર.આર. બોરડે સમગ્ર તાપી જિલ્લામાં ઉંદર પકડવાની ચીકણી જાળ એટલે કે **’ગ્લુ-ટ્રેપ’ (ગ્લુ-બોર્ડ/સ્ટીકી ટ્રેપ)**ના ઉત્પાદન, વેચાણ તેમજ ઉપયોગ પર પ્રતિબંધ ફરમાવતું જાહેરનામું બહાર પાડ્યું છે.
ગુજરાત પ્રાણી કલ્યાણ બોર્ડ અને સંયુક્ત પશુપાલન નિયામકની માહિતી મુજબ, ઉંદર સહિત અન્ય નાના જીવોને પકડવા માટે વપરાતી ગ્લુ-ટ્રેપ અત્યંત ક્રૂર અને અમાનવીય સાધન છે, જેના કારણે પ્રાણીઓને લાંબા સમય સુધી અસહ્ય પીડા સહન કરવી પડે છે. કોઈપણ જીવને બિનજરૂરી વેદના પહોંચાડવી કાયદેસર ગુનો ગણાય છે.
આ જાહેરનામું 12 જુલાઈ, 2026 સુધી અમલમાં રહેશે. જાહેરનામાનો ભંગ કરીને ગ્લુ-ટ્રેપનું ઉત્પાદન, વેચાણ અથવા ઉપયોગ કરતા કોઈપણ વ્યક્તિ, વેપારી અથવા સંસ્થા સામે કાયદા મુજબ કડક શિક્ષાત્મક કાર્યવાહી કરવામાં આવશે.
