હિંમતનગરના ખાટુંનગર (રાયસીંગપુરા) ખાતે ભવ્ય મંદિરનું ૨૦ જૂને ભૂમિપૂજન

સાબરકાંઠા જિલ્લાના હિંમતનગર તાલુકાના રાયસીંગપુરા (ખાટુંનગર) ખાતે આસ્થા, ભક્તિ અને ધાર્મિક શ્રદ્ધાનું અનોખું કેન્દ્ર સાકાર થવા જઈ રહ્યું છે. ખાટુંશ્યામજી, રાધાકૃષ્ણ, સાંવરિયા શેઠ અને ભગવાન શ્રીરામને સમર્પિત ભવ્ય મંદિરનું નિર્માણ થનાર છે, જે ઉત્તર ગુજરાતના શ્રદ્ધાળુઓ માટે વિશેષ આકર્ષણનું કેન્દ્ર બનશે. આ દિવ્ય મંદિરના નિર્માણ માટે આગામી ૨૦ જૂનના રોજ શાસ્ત્રોક્ત વિધિ સાથે ભવ્ય ભૂમિપૂજન કાર્યક્રમ યોજાનાર છે.

મંદિર ટ્રસ્ટ દ્વારા આયોજિત આ કાર્યક્રમમાં ગ્રામજનો, દાતાશ્રીઓ, આગેવાનો તેમજ મોટી સંખ્યામાં ભક્તજનો ઉપસ્થિત રહેશે. ભૂમિપૂજનને લઈને સમગ્ર વિસ્તારમાં ઉત્સાહનો માહોલ જોવા મળી રહ્યો છે.

રાજસ્થાન જેવી દિવ્યતા હવે હિંમતનગરમાં

ખાટુંશ્યામજી અને સાંવરિયા શેઠના દર્શન માટે સામાન્ય રીતે ભક્તોને રાજસ્થાન સુધીની યાત્રા કરવી પડતી હોય છે. પરંતુ હવે હિંમતનગર નજીક જ આ ભવ્ય મંદિરના નિર્માણથી ભક્તોને ઘરઆંગણે જ દર્શન અને ભક્તિનો લાભ મળશે.

મંદિર પરિસરમાં ભગવાન શ્રીરામ અને સાંવરિયા શેઠની ૬૧ ફૂટ ઊંચી ભવ્ય પ્રતિમાઓ સ્થાપિત કરવામાં આવશે. આ વિશાળ પ્રતિમાઓ સમગ્ર વિસ્તાર માટે આધ્યાત્મિક આકર્ષણનું કેન્દ્ર બનશે અને મંદિરની ભવ્યતામાં ચાર ચાંદ લગાવશે.

દાતાશ્રીઓના સહયોગથી સાકાર થશે સપનું

મંદિર ટ્રસ્ટના પ્રમુખ મયંક પટેલ અને મંત્રી રીકેન પટેલના જણાવ્યા મુજબ અનેક શ્રદ્ધાળુ પરિવારોના ઉદાર સહયોગથી મંદિરનું નિર્માણ કાર્ય હાથ ધરવામાં આવ્યું છે.

મંદિરમાં સ્થાપિત થનારી મૂર્તિઓ અને શિલાઓના મુખ્ય દાતાઓમાં:

• ખાટુંશ્યામજીની મૂર્તિ અને શિલાઓ – સુમિત ગૌરીશંકર રાવલ પરિવાર, વડાલી
• રાધાકૃષ્ણની મૂર્તિ – શૈલેષ બાબુભાઈ પટેલ પરિવાર, બહીયલ (હસ્તે સ્મિતાબેન રીકેનભાઈ પટેલ)
• સાંવરિયા શેઠની મૂર્તિ – દિનેશ શાંતિલાલ પટેલ પરિવાર, માથાસુર (હસ્તે ગુંજનબેન મયંકકુમાર પટેલ)

ધાર્મિક પ્રવાસન ધામ તરીકે વિકસશે સ્થળ

ખાટુંનગરના ગ્રામજનો અને ટ્રસ્ટના સભ્યો દ્વારા ભૂમિપૂજન સમારોહને ભવ્ય બનાવવા માટે જોરશોરથી તૈયારીઓ ચાલી રહી છે. મંદિરનું નિર્માણ પૂર્ણ થયા બાદ આ સ્થળ માત્ર હિંમતનગર કે સાબરકાંઠા પૂરતું જ નહીં, પરંતુ સમગ્ર ઉત્તર ગુજરાતના શ્રદ્ધાળુઓ માટે મહત્વપૂર્ણ ધાર્મિક કેન્દ્ર તરીકે ઉભરી આવશે તેવી આશા વ્યક્ત કરવામાં આવી રહી છે.

આ ભવ્ય મંદિર ભક્તિ, સંસ્કૃતિ અને આધ્યાત્મિકતાનું અનોખું પ્રતિક બની આગામી પેઢીઓ માટે આસ્થાનું પ્રેરણાસ્ત્રોત બનશે.