સાબરકાંઠા જિલ્લાના વડાલી તાલુકાના મોરડ ગામે આવેલા પ્રસિદ્ધ હરસિદ્ધ ભવાની માતાજી મંદિર ખાતે નવરાત્રિના પાવન પર્વ નિમિત્તે આસો સુદ આઠમના પવિત્ર દિવસે ભવ્ય હવનનું આયોજન કરવામાં આવ્યું હતું. આ ધાર્મિક પ્રસંગે મોરડ ગામ સહિત આસપાસના ગ્રામ્ય વિસ્તારોમાંથી મોટી સંખ્યામાં ધર્મપ્રેમી ભક્તોએ ઉપસ્થિત રહી માતાજીના દર્શન કરી ધન્યતા અનુભવી હતી.
મંદિર પરિસરમાં વહેલી સવારે શાસ્ત્રોક્ત વિધિ-વિધાન સાથે હવનનો પ્રારંભ થયો હતો. ભૂદેવોના વેદોક્ત મંત્રોચ્ચાર વચ્ચે ભક્તોએ શ્રદ્ધાપૂર્વક આહુતિઓ અર્પણ કરી હતી. બપોર બાદ સાંજે પાંચ વાગ્યે હવનમાં મુખ્ય આહુતિ અર્પણ કર્યા બાદ વિધિવત્ પૂર્ણાહુતિ કરવામાં આવી હતી. આ પ્રસંગે બાબુલાલ ઠાકોર દ્વારા હવનમાં શ્રીફળ તથા ઘી હોમીને મુખ્ય ધાર્મિક વિધિ સંપન્ન કરવામાં આવી હતી.
આઠમના પાટોત્સવ અને હવન નિમિત્તે સમગ્ર મંદિર પરિસર ‘જય માતાજી’ના નાદથી ગુંજી ઊઠ્યું હતું અને ભક્તિમય માહોલ સર્જાયો હતો. હવનની પૂર્ણાહુતિ બાદ દર્શનાર્થે આવેલા તમામ ભાવિક ભક્તોએ મહાપ્રસાદ ગ્રહણ કર્યો હતો. આમ, મોરડ ગામ ખાતે યોજાયેલ આઠમનો ધાર્મિક ઉત્સવ ખૂબ જ શ્રદ્ધા અને ભક્તિસભર વાતાવરણમાં સંપન્ન થયો હતો.
