પ્રાંતિજ તાલુકાના દલપુર હાઇવે પર આવેલા શ્રી જોગણી માતાજીના મંદિરે દર રવિવારે ભરાય છે ભવ્ય મેળો: મોટી સંખ્યામાં ભક્તોનું ઘોડાપૂર
પ્રાંતિજ તાલુકાના દલપુર નજીક નેશનલ હાઇવે પર બિરાજમાન પરમ પૂજ્ય શ્રી જોગણી માતાજીનું મંદિર સમગ્ર પંથકમાં ભક્તિ અને આસ્થાનું વિશેષ કેન્દ્ર બન્યું છે. અહીં દર રવિવારે ભવ્ય મેળો ભરાય છે, જેમાં વહેલી સવારથી જ દલપુર સહિત આસપાસના ગ્રામ્ય વિસ્તારો અને હાઇવે પરથી પસાર થતા હજારો શ્રદ્ધાળુઓ માઁના દર્શનાર્થે ઉમટી પડે છે.
રવિવારના દિવસે ભરાતા આ પરંપરાગત મેળામાં મંદિર પરિસર ભક્તિમય માહોલથી ગુંજી ઊઠે છે. ભક્તો માઁ જોગણીના ચરણોમાં શીશ ઝુકાવી સુખ, શાંતિ અને સમૃદ્ધિની પ્રાર્થના કરે છે તેમજ પોતાની મનોકામના પૂર્ણ થતાં શ્રીફળ અને ધજા ચઢાવી ધન્યતા અનુભવે છે.
મેળાને કારણે મંદિર પરિસરમાં પૂજાપો, પ્રસાદ, રમકડાં અને ખાણીપીણીની નાની-મોટી દુકાનોથી અનેરો ઉત્સાહ અને લોકમેળા જેવો માહોલ સર્જાય છે.
હાઇવે પરથી પસાર થતા વાહનચાલકો અને યાત્રિકો પણ અચૂક રોકાઈને માઁના ચરણોમાં નમન કરી પોતાની સફરની મંગલકામના કરે છે.
દર્શનાર્થે આવતા તમામ ભક્તો માટે દર્શનની સરળ વ્યવસ્થા જળવાઈ રહે તે માટે સ્થાનિકો દ્વારા વિશેષ સહયોગ આપવામાં આવે છે.
