સાબરકાંઠા જિલ્લાના વડાલી તાલુકાના ગ્રામ્ય વિસ્તારોમાં વાહનચોર ટોળકી ફરી સક્રિય થઈ હોવાનું સામે આવ્યું છે. રહેડા અને હિંમતપુર ગામ વિસ્તારમાંથી અલગ-અલગ સ્થળોએ પાર્ક કરાયેલા કુલ ત્રણ બાઈકની ચોરી થતાં સ્થાનિકોમાં ચિંતાનો માહોલ સર્જાયો છે.
પ્રાથમિક માહિતી મુજબ, તસ્કરોએ મોડી રાત્રે વરસાદી માહોલ અને અંધકારનો લાભ ઉઠાવી ચોરીને અંજામ આપ્યો હતો. ચોરોએ પોતાના ચહેરા પર રૂમાલ બાંધી ઓળખ છુપાવી હતી અને બાઈક લઈને સ્થળ પરથી ફરાર થઈ ગયા હતા.
સમગ્ર ઘટના નજીકમાં લાગેલા સીસીટીવી કેમેરામાં કેદ થઈ છે. સીસીટીવી ફૂટેજમાં શંકાસ્પદ તસ્કરો બાઈક ચોરી કરતા અને ત્યારબાદ અંધારાનો લાભ લઈ ભાગી જતા નજરે પડે છે. પોલીસે ફૂટેજના આધારે આરોપીઓની ઓળખ મેળવવાના પ્રયાસો શરૂ કર્યા છે.
એક જ રાત્રે ત્રણ બાઈકની ચોરી થતાં ગ્રામ્ય વિસ્તારોમાં વાહન માલિકોમાં ભયનો માહોલ જોવા મળી રહ્યો છે. સ્થાનિકોએ પોલીસ પેટ્રોલિંગ વધારવાની તેમજ રાત્રિના સમયે સુરક્ષા વ્યવસ્થા વધુ સઘન બનાવવાની માંગ કરી છે.
વડાલી પોલીસે બાઈક ચોરીની ફરિયાદોના આધારે ગુનો નોંધી તપાસ હાથ ધરી છે. સીસીટીવી ફૂટેજ અને અન્ય તકનીકી પુરાવાના આધારે વાહનચોર ટોળકી સુધી પહોંચવા માટે કાર્યવાહી તેજ કરવામાં આવી છે. પોલીસે ટૂંક સમયમાં આરોપીઓને ઝડપી પાડવાનો વિશ્વાસ વ્યક્ત કર્યો છે.
