સુરત સાયબર ક્રાઇમની મોટી સફળતા: ૧૨૧ નકલી APK એપ બનાવનાર ૧૮ વર્ષીય યુવક ઝડપાયો, દેશભરમાં ₹૬૪ કરોડથી વધુની સાયબર ઠગાઈનો ખુલાસો
સુરત સાયબર ક્રાઇમ પોલીસે અડાજણ વિસ્તારના એક વૃદ્ધ વેપારી સાથે થયેલી રૂ. ૫ લાખની ઓનલાઈન છેતરપિંડીના કેસમાં મહત્વની સફળતા મેળવી છે. તપાસ દરમિયાન ઉત્તર પ્રદેશના કાસગંજ જિલ્લાના ૧૮ વર્ષીય રોહિત સાક્યની ધરપકડ કરવામાં આવી છે. પ્રાથમિક તપાસમાં સામે આવ્યું છે કે આરોપીએ માત્ર ધોરણ-૧૧ સુધી અભ્યાસ કર્યો હોવા છતાં ૧૨૧ નકલી એન્ડ્રોઇડ APK એપ્લિકેશનો બનાવી દેશભરના સાયબર ઠગોને વેચી હતી.
પોલીસના જણાવ્યા મુજબ અડાજણના એક વૃદ્ધ વેપારીને વોટ્સએપ મારફતે બેન્ક જેવી દેખાતી નકલી એપની APK ફાઇલ મોકલવામાં આવી હતી. વેપારીએ એપ ડાઉનલોડ કરતાં જ મોબાઇલનો કંટ્રોલ સાયબર ઠગોના હાથમાં પહોંચી ગયો હતો અને તેમના બેન્ક ખાતામાંથી રૂ. ૫ લાખ ઉપાડી લેવામાં આવ્યા હતા. ફરિયાદના આધારે સુરત સાયબર ક્રાઇમ પોલીસે ટેક્નિકલ તપાસ શરૂ કરી અને ૧૪ જુલાઈએ ઉત્તર પ્રદેશમાંથી આરોપીની ધરપકડ કરી હતી.
પૂછપરછ દરમિયાન ખુલાસો થયો કે આરોપીએ વિવિધ બેન્કો, આરટીઓ ચલણ, કસ્ટમર સપોર્ટ, પીએમ કિસાન, ડીમાર્ટ સહિત અનેક સેવાઓના નામે કુલ ૧૨૧ નકલી APK ફાઇલો તૈયાર કરી હતી. તે આ ફાઇલો સાયબર ગેંગને દર મહિને રૂ. ૧૦ હજારથી ૧૫ હજારના ભાડે આપતો હતો અને ઉપયોગ ચાલુ રાખવા માટે અલગથી રિન્યૂઅલ ચાર્જ પણ વસૂલતો હતો.
તપાસમાં જાણવા મળ્યું છે કે આ નકલી એપ્સ હજારો મોબાઇલમાં ઇન્સ્ટોલ કરવામાં આવી હતી. તેના માધ્યમથી સાયબર ઠગોએ પીડિતોના મોબાઇલનો ગેરકાયદેસર ઍક્સેસ મેળવી બેન્ક ખાતા, ક્રેડિટ કાર્ડ અને ડિજિટલ પેમેન્ટ એપ્સમાંથી દેશભરમાં રૂ. ૬૪ કરોડથી વધુની સાયબર છેતરપિંડી આચરી હોવાનું સામે આવ્યું છે. સૌથી વધુ દુરુપયોગ આરટીઓ ચલણ, કસ્ટમર સપોર્ટ, પંજાબ નેશનલ બેન્ક અને સ્ટેટ બેન્ક ઓફ ઇન્ડિયાના નામે બનાવેલી નકલી એપ્સનો થયો હોવાનું પોલીસ તપાસમાં બહાર આવ્યું છે.
પોલીસના જણાવ્યા મુજબ આરોપી યુટ્યુબ પર વીડિયો જોઈ અને કૃત્રિમ બુદ્ધિમત્તા (AI)ની મદદથી આ નકલી એપ્લિકેશનો તૈયાર કરતો હતો. અસલી બેન્કો અને સંસ્થાઓના લોગો તેમજ ડિઝાઇનનો ઉપયોગ કરીને એપ્સને વિશ્વસનીય દેખાડવામાં આવતી હતી, જેના કારણે સામાન્ય લોકો સરળતાથી તેની જાળમાં ફસાઈ જતા હતા. એપ ઇન્સ્ટોલ થતાં જ સાયબર ગેંગ પીડિતના મોબાઇલનો સંપૂર્ણ ઍક્સેસ મેળવી વ્યક્તિગત અને બેન્કિંગ માહિતી ચોરી લેતા હતા.
સુરત સાયબર ક્રાઇમ પોલીસે આરોપી પાસેથી બે મોબાઇલ ફોન અને નવ લેપટોપ જપ્ત કર્યા છે. હાલ સમગ્ર સાયબર નેટવર્ક, જામતારા ગેંગ સાથેના સંભવિત સંબંધો અને અન્ય સંડોવાયેલા આરોપીઓ અંગે વધુ તપાસ હાથ ધરવામાં આવી છે.
પોલીસની અપીલ: અજાણી લિંક અથવા APK ફાઇલ ક્યારેય ડાઉનલોડ ન કરો. કોઈપણ એપ્લિકેશન માત્ર સત્તાવાર Google Play Store અથવા Apple App Store પરથી જ ઇન્સ્ટોલ કરો અને અજાણ્યા વ્યક્તિ દ્વારા મોકલાયેલી ફાઇલોથી સાવચેત રહો.
