સાબરકાંઠા પોલ્ટ્રી ફાર્મર્સ એસોસિએશનની મહત્વની બેઠક યોજાઈ: લેબર ચાર્જ અને કંપનીઓ દ્વારા થતા શોષણ મુદ્દે ઉગ્ર ચર્ચા
સાબરકાંઠા જિલ્લા પોલ્ટ્રી ફાર્મર એસોસિએશનના તત્વાવધાન હેઠળ આજરોજ એક અગત્યની સમીક્ષા મિટિંગનું આયોજન કરવામાં આવ્યું હતું. આ બેઠકમાં જિલ્લાના મોટી સંખ્યામાં પોલ્ટ્રી ફાર્મરો ઉપસ્થિત રહ્યા હતા. મિટિંગ દરમિયાન ફાર્મિંગ ક્ષેત્રે વધતા જતા લેબર ચાર્જ (મજૂરી ખર્ચ) તેમજ ખાનગી પોલ્ટ્રી કંપનીઓ દ્વારા કરવામાં આવતા આર્થિક અને નીતિગત શોષણ અંગે વિસ્તૃત ગંભીર ચર્ચાઓ કરવામાં આવી હતી.
ફાર્મરો દ્વારા રજૂ કરાયેલી રજૂઆતો મુજબ, ઉત્પાદન ખર્ચ સામે યોગ્ય વળતર ન મળવાને કારણે અને કંપનીઓની એકતરફી નીતિઓને લીધે પશુપાલકો અને ફાર્મરો ભારે આર્થિક મુશ્કેલી વેઠી રહ્યા છે.
GC (ગ્રોઇંગ ચાર્જ) ના મુદ્દે ટૂંક સમયમાં લેવાશે આખરી નિર્ણય
એસોસિએશનના હોદ્દેદારો અને મંડળ દ્વારા જણાવવામાં આવ્યું હતું કે ફાર્મરોના હિત અને હક્કોનું રક્ષણ કરવું એ પ્રાથમિકતા છે. આવનાર દિવસોમાં પોલ્ટ્રી ફાર્મિંગ ક્ષેત્ર વધુ મજબૂત બને અને ખેડૂતોમાં જાગૃતતા આવે તેવા હેતુથી એસોસિએશન મંડળ દ્વારા ફરી એક વિશેષ બેઠક બોલાવવામાં આવશે. આ આગામી બેઠકમાં GC (ગ્રોઇંગ ચાર્જ) વધારવા અને કંપનીઓ સમક્ષ મૂકવાના મુદ્દાઓ અંગે ગહન વિચારણા કરી સર્વસંમતિથી યોગ્ય અને આકરા નિર્ણયો લેવામાં આવશે.
‘એકતા જ આપણી તાકાત’ – સર્વત્ર સાથ અને સહકારની અપીલ
બેઠકના અંતે એસોસિએશન દ્વારા જિલ્લાના તમામ પોલ્ટ્રી ફાર્મર મિત્રોને એકજૂથ થઈને આગળ વધવા આહ્વાન કરવામાં આવ્યું હતું. “એકતા જ આપણી સૌથી મોટી તાકાત છે” ના નારા સાથે ફાર્મર હિતમાં સૌનો સાથ અને સહકાર અપેક્ષિત હોવાનું જણાવ્યું હતું. ‘સૌનો સાથ, સૌનો સહકાર — ફાર્મર હિતનો સંકલ્પ’ સાથે એસોસિએશને આગામી લડત કે નિર્ણય માટે સંગઠિત રહેવા કટિબદ્ધતા વ્યક્ત કરી હતી.
