હિંમતનગરના કાંકણોલ નજીકથી એલસીબીએ રૂ.૭૭.૬૬ લાખની દારૂ ભરેલી ટ્રક ઝડપી

જીગ્નેશ સોની હિંમતનગર

સાબરકાંઠા જિલ્લામાં છેલ્લા કેટલાક સમયથી બુટલેગરો પોલીસ અથવા તો રાજકીય નેતાઓના ઈશારે રાજસ્થાનથી ગુજરાતમાં પ્રવેશી સાબરકાંઠામાં થઈ અન્ય સ્થળે દારૂનો મોટો જથ્થો વાહનોમાં ભરીને હેરાફેરી કરી રહયા છે ત્યારે રવિવારે સાબરકાંઠા એલસીબીએ હિંમતનગર-શામળાજી રોડ પર આવેલ કાંકણોલ ગામની સીમમાંથી પસાર થતી એક શંકાસ્પદ ટ્રકને અટકાવી તેમાં તપાસ કરતાં પ્લાસ્ટીકના કટ્ટા નીચે રખાયેલ દારૂ અને બિયરની પેટીઓ મળી આવી હતી ત્યારબાદ એલસીબીએ ટ્રકના ચાલકની પુછપરછ કરી તેની ટ્રકમાંથી ૬૬૯ પેટીમાં રખાયેલ ૧૩પ૮૪ બોટલો મળી રૂ.૭૭,૬૬,૧૯૬નો જથ્થો કબ્જે લીધો હતો ત્યારબાદ ચાલક પાસેથી મોબાઈલ, ચાર નંબર પ્લેટ અને ટ્રક મળી અંદાજે રૂ.૯ર,૭૬,૧૯૬નો મુદ્દામાલ કબ્જે લઈ પકડાયેલા ચાલક તથા દારૂ અને બિયરની હેરાફેરીમાં સંડોવાયેલ અન્ય બે મળી ત્રણ જણા વિરૂધ્ધ હિંમતનગર એ-ડીવીઝન પોલીસ સ્ટેશનમાં ફરીયાદ નોંધાવી હતી.
આ અંગેની વિગત એવી છે કે જિલ્લા પોલીસવડા ર્ડા.પાર્થરાજસિંહ ગોહિલની સુચનાથી એલસીબીના પીઆઈ ડી.સી.સાકરીયા પીએસઆઇ એસ.જે ચાવડા તથા તેમના સ્ટાફે સ્પેશીયલ પ્રોહી. ડ્રાઈવનું આયોજન કરી હિંમતનગર એ-ડીવીઝન પોલીસ સ્ટેશનમાં વાહન ચેકીંગ શરૂ કર્યું હતું દરમ્યાન રવિવારે એવી બાતમી મળી હતી કે શામળાજી તરફથી આવી રહેલ ટ્રક નં.ડીડી.૦૧જે.૯૩૩૧માં દારૂ અને બિયરનો જથ્થો ભરી જઈ રહેલ દેવેન્દ્ર દાનારામ જાટ હિંમતનગર તરફ આવી રહયો છે જે આધારે એલસીબીએ કાંકણોલ પાસે વોચ ગોઠવીને વાહન ચેકીંગ શરૂ કર્યું હતું.
જયાં બાતમી મુજબ આવી રહેલ ટ્રકને અટકાવી તેમાં તપાસ હાથ ધરાઈ હતી દરમ્યાન આ ટ્રકમાં પ્લાસ્ટીકના કટ્ટા નીચે રખાયેલ દારૂ અને બિયરની અંદાજે ૬૬૯ પેટી મળી આવી હતી ત્યારબાદ પોલીસે હેરાફેરી માટેનો પરવાનો રજુ કરવા માટે ચાલકને કહયું હતું પરંતુ ચાલકે રજુ ન કરતાં પોલીસે ટ્રકમાંથી અંદાજે રૂ.૭૭.૬૬ લાખથી વધુનો ૧૩,પ૮૪ બોટલો કબ્જે લીધી હતી તથા ચાલક પાસેથી ટ્રકની આગળ પાછળની ચાર ખોટી નંબર પ્લેટ પણ પકડી લીધી હતી તે આધારે એલસીબીએ દારૂ, મોબાઈલ, નંબર પ્લેટ તથા ટ્રક મળી અંદાજે રૂ.૯ર.૭૬ લાખનો મુદ્દામાલ કબ્જે લઈ પકડાયેલા દેવેન્દ્ર જાટ અને દારૂ ભરી આપનાર રાજસ્થાનના હનુમાનગઢના ભવાન સિંહ ચારણ અને ખોટી બિલ્ટી આપી ટ્રકમાં દારૂ અને બિયર ભરી આપનાર સાચોરના દેવેન્દ્ર બિશ્નોઈ મળી ત્રણેય વિરૂધ્ધ એ-ડીવીઝન પોલીસ સ્ટેશનમાં ગુનો નોંધાવ્યો હતો.