ઈડરના ઐતિહાસિક ‘રાણી તળાવ’ના કરોડોના બ્યુટીફિકેશન પ્રોજેક્ટમાં વિલંબ: ૧૩ મહિનાની સમયમર્યાદા વધારવા દરખાસ્ત

ઈડર: સાબરકાંઠા જિલ્લાના ઐતિહાસિક ઈડર નગરપાલિકા વિસ્તારમાં આવેલા પ્રખ્યાત ‘રાણી તળાવ’ના બ્યુટીફિકેશન અને જીર્ણોદ્ધાર (Rejuvenation) માટે હાથ ધરાયેલા કરોડો રૂપિયાના પ્રોજેક્ટમાં વિલંબ થયો હોવાનું સામે આવ્યું છે. કેન્દ્ર અને રાજ્ય સરકારની ‘અમૃત ૨.૦’ યોજના અંતર્ગત હાથ ધરાયેલી આ કામગીરી નિર્ધારિત સમયમાં પૂર્ણ ન થતાં, ઈડર નગરપાલિકાના મુખ્ય અધિકારી દ્વારા પ્રાદેશિક કમિશનર (ગાંધીનગર ઝોન) સમક્ષ કામ પૂર્ણ કરવા માટે વધુ ૧૩ મહિનાની સમયમર્યાદા વધારવા માટે સત્તાવાર દરખાસ્ત મોકલવામાં આવી છે.

₹૪.૮૫ કરોડનો મહત્વકાંક્ષી પ્રોજેક્ટ

પ્રાપ્ત વિગતો અનુસાર, વર્ષ ૨૦૨૦-૨૧ની ગ્રાન્ટ અંતર્ગત રાણી તળાવને આધુનિક અને પર્યટન સ્થળ તરીકે વિકસાવવા માટે અંદાજે ₹૪,૮૫,૪૦,૩૫૩/- (રૂપિયા ચાર કરોડ પંચાસી લાખથી વધુ) નું ભવ્ય આયોજન કરવામાં આવ્યું હતું. આ પ્રોજેક્ટ માટે ટેન્ડર પ્રક્રિયા પૂર્ણ કરી મહેસાણાની ‘જનક કન્સ્ટ્રક્શન કંપની’ને જાન્યુઆરી ૨૦૨૪માં સત્તાવાર રીતે વર્ક ઓર્ડર આપવામાં આવ્યો હતો.

શરૂઆતથી જ નડ્યા ટેકનિકલ અવરોધો

આ પ્રોજેક્ટના ડી.પી.આર. (DPR) મંજૂરીના તબક્કે જ ગાંધીનગર ઝોનની પ્રાદેશિક કમિશનર કચેરી દ્વારા સપ્ટેમ્બર ૨૦૨૩માં કેટલીક ક્ષતિઓ દર્શાવવામાં આવી હતી. જેમાં:

• ગુજરાત નગરપાલિકા અધિનિયમ ૧૯૬૩ હેઠળ સામાન્ય સભાના ઠરાવનું પ્રમાણપત્ર.

• પ્રોજેક્ટ વિસ્તારની જમીન માલિકીના આધાર પુરાવા.

• તળાવની ફરતે વોલ અને રેલિંગ (Wall & Railing) ના અંદાજપત્રકમાં સુધારા.

• ઇરિગેશન (Irrigation) ના અંદાજપત્રક અને ક્વોટેશનની વિગતો ખૂટતી હોવાથી ખુલાસો માંગવામાં આવ્યો હતો.

કામ અધૂરું રહેતા સમય વધારવાની નોબત આવી

નગરપાલિકા દ્વારા આ ક્ષતિઓની પૂર્તતા કરીને કામ શરૂ તો કરાવવામાં આવ્યું, પરંતુ વિવિધ ટેકનિકલ કારણોસર કામગીરી અત્યંત ધીમી ગતિએ ચાલી રહી છે. હાલ માર્ચ ૨૦૨૬ની સ્થિતિએ પણ આ કામ પ્રગતિ હેઠળ (In Progress) હોવાથી ઈડર નગરપાલિકા દ્વારા જરૂરી ચેકલિસ્ટ સાથે સરકારમાં ૧૩ મહિનાનો સમયગાળો લંબાવવા માટે વિનંતીપત્ર મોકલવામાં આવ્યો છે.

આ કરોડોના પ્રોજેક્ટમાં થઈ રહેલા વિલંબને કારણે સ્થાનિક રહીશો અને પર્યાવરણ પ્રેમીઓમાં પણ તળાવ ક્યારે નવું રૂપ ધારણ કરશે તેને લઈને ઉત્સુકતા અને ચર્ચા જાગી છે. નગરપાલિકા તંત્ર દ્વારા આ કામગીરી વહેલી તકે પૂર્ણ થાય તેવા પ્રયાસો કરવામાં આવી રહ્યા હોવાનું જાણવા મળ્યું છે.