સાબરકાંઠા જિલ્લા કોંગ્રેસના હિંમતનગરમાં આક્રમક ધરણાં: હલદ્વાની ઘટના અને સામાજિક ભેદભાવની રાજનીતિ સામે વિરોધ
સાબરકાંઠા જિલ્લા કોંગ્રેસ સમિતિ દ્વારા વિવિધ સામાજિક અને રાજકીય મુદ્દાઓને લઈને હિંમતનગરના મોતીપુરા સર્કલ ખાતે આક્રમક ધરણાં અને વિરોધ પ્રદર્શન યોજવામાં આવ્યું હતું. મોતીપુરા સર્કલ પર સ્થિત મહાત્મા ગાંધીજીની પ્રતિમા પાસે યોજાયેલા આ વિરોધ કાર્યક્રમમાં કોંગ્રેસના પદાધિકારીઓ, આગેવાનો અને કાર્યકર્તાઓ મોટી સંખ્યામાં એકઠા થયા હતા.
સામાજિક ભેદભાવ અને કેસો પરત ખેંચવાની માંગ
ઉત્તરાખંડના હલદ્વાનીમાં બનેલી ઘટના બાદ શુદ્ધિકરણના નામે દેશમાં છૂઆછૂત અને સામાજિક ભેદભાવને પ્રોત્સાહન આપતી રાજનીતિ સામે કોંગ્રેસે તીવ્ર આક્રોશ વ્યક્ત કર્યો હતો. આ સાથે જ, સામાજિક ન્યાય અને બંધારણના રક્ષણ માટે અવાજ ઉઠાવનારા કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે અને લોકસભામાં વિપક્ષના નેતા રાહુલ ગાંધી સામે દાખલ કરવામાં આવેલા કેસો તાત્કાલિક અસરથી પરત ખેંચવામાં આવે તેવી પણ ઉગ્ર માંગ કરવામાં આવી હતી.
સૂત્રોચ્ચાર અને ભવિષ્યની ચીમકી
ધરણાં પ્રદર્શન દરમિયાન કાર્યકર્તાઓએ હાથમાં બેનરો સાથે “સંવિધાન બચાવો”, “લોકશાહી બચાવો” અને “છૂઆછૂતની રાજનીતિ બંધ કરો” જેવા નારા લગાવી સમગ્ર પરિસર ગજવી મૂક્યું હતું. કોંગ્રેસ નેતાઓએ સ્પષ્ટ શબ્દોમાં ચેતવણી આપી હતી કે બંધારણના મૂલ્યો, સામાજિક સમાનતા અને ન્યાયની લડાઈ માટે કોંગ્રેસ આગામી દિવસોમાં પણ પોતાનો અવાજ વધુ બુલંદ કરશે.
“સામાજિક ન્યાય, બંધારણીય મૂલ્યો અને લોકશાહીના રક્ષણ માટે કોંગ્રેસ પક્ષ અન્યાય સામે પોતાની લડાઈ સતત ચાલુ રાખશે.”
— રામભાઈ વી. સોલંકી (પ્રમુખ, સાબરકાંઠા જિલ્લા કોંગ્રેસ સમિતિ)
