હિંમતનગરમાં રોડની દુર્દશા: આઠ મહિનાથી પ્રજા પરેશાન, તંત્ર નિષ્ક્રિય

દિવાળી સુધીમાં કામ શરૂ નહીં થાય તો આંદોલન કરવાની પ્રજાજનોની ચીમકી

હિંમતનગર શહેરના હાર્દ સમાન ખેડ તસીયા રોડ પર આવેલા રિલાયન્સ મોલથી મહાવીરનગર ચાર રસ્તા સુધીનો માર્ગ છેલ્લા આઠ મહિનાથી અત્યંત બિસ્માર હાલતમાં ફેરવાઈ જતાં સ્થાનિક નાગરિકો અને વાહનચાલકો ભારે હાલાકી ભોગવી રહ્યા છે. સ્ટોર્મ વોટર લાઇન નાખવા માટે હિંમતનગર નગરપાલિકા દ્વારા કરાયેલા ખોદકામ બાદ આજદિન સુધી રસ્તાનું સમારકામ પૂરું કરવામાં આવ્યું નથી, જેના કારણે નગરપાલિકા તંત્રની બેદરકારી સામે ગંભીર સવાલો ઊભા થયા છે.

ધૂળ અને ખાડાથી લોકોનું આરોગ્ય જોખમાયું

માર્ગ પરની ઉબડખાબડ સપાટી, ઊંડા ખાડા અને સતત ઊડતી ધૂળને કારણે ટુ-વ્હીલર ચાલકો માટે અહીંથી પસાર થવું જીવના જોખમ સમાન બન્યું છે. આ ઉપરાંત ફોર-વ્હીલર ચાલકો અને રાહદારીઓ પણ ભારે મુશ્કેલી વેઠી રહ્યા છે. દરરોજ અવરજવર કરતા લોકો માટે આ રસ્તો નર્ક સમાન બની ગયો છે. સતત ઊડતી ધૂળના કારણે શ્વાસ સંબંધી બીમારીઓ થવાની ભીતિ સ્થાનિકો વ્યક્ત કરી રહ્યા છે.

સૂચિત રસ્તો પણ બિસ્માર, રહીશોમાં ભારે રોષ

આ મુખ્ય માર્ગનો ઉપયોગ હિંમતનગરની આસપાસની સોસાયટીઓના રહીશો ઉપરાંત આસપાસના અનેક ગામોમાં જવા માટે ટૂંકા રસ્તા (Short Route) તરીકે થાય છે. આઠ-આઠ મહિના વીતી જવા છતાં તંત્ર દ્વારા કોઈ નક્કર કામગીરી કરવામાં ન આવતાં પ્રજાજનોમાં ભારે રોષ વ્યાપી ગયો છે.

ધારાસભ્ય અને પાલિકાને રજૂઆતો છતાં “દાગ સારા હૈ” જેવા જવાબો!

સ્થાનિક રહીશો દ્વારા હિંમતનગર નગરપાલિકાના અધિકારીઓ તેમજ સ્થાનિક ધારાસભ્ય વી.ડી. ઝાલાને વારંવાર લેખિત તથા મૌખિક રજૂઆતો કરવામાં આવી છે. જવાબદાર અધિકારીઓ અને પદાધિકારીઓ દ્વારા ‘રસ્તો તૈયાર થઈ ગયો છે’ તેવા દાવા કરવામાં આવે છે, પરંતુ વાસ્તવિક સ્થિતિ દયનીય છે. જો રસ્તો બની ગયો હોય તો પ્રજાએ આટલી યાતના કેમ ભોગવવી પડે છે? તેવો તીખો સવાલ સ્થાનિકો ઉઠાવી રહ્યા છે.

દિવાળી સુધીનું અલ્ટીમેટમ: આંદોલનની તૈયારી

લાંબા સમયથી હાલાકી ભોગવી રહેલા સ્થાનિકોનો સબરનો બાંધ હવે તૂટી રહ્યો છે. નાગરિકોએ ચેતવણી આપી છે કે જો દિવાળી સુધીમાં આ માર્ગનું કામ સત્વરે શરૂ કરવામાં નહીં આવે તો વિરોધ પ્રદર્શન કરી ઉગ્ર આંદોલન કરવામાં આવશે. હવે જોવાનું એ રહે છે કે નગરપાલિકા પ્રજાની આ મુશ્કેલીને ગંભીરતાથી લઈને તાત્કાલિક કામ શરૂ કરાવે છે કે પછી પ્રજાને ધૂળ અને ખાડા વચ્ચે જ દિવસો વિતાવવા પડશે.