ગાંધી જયંતિ અને શાસ્ત્રી જયંતિ નિમિત્તે માનવતા જાગૃત ટ્રસ્ટ દ્વારા સરાહનીય સેવાકાર્ય: નિરાધાર પરિવારને રાશન કિટનું વિતરણ, ઘર બનાવી આપવાની આપી ખાતરી
૨ ઑક્ટોબરના રોજ રાષ્ટ્રપિતા મહાત્મા ગાંધીજી અને પૂર્વ વડાપ્રધાન સ્વ. લાલ બહાદુર શાસ્ત્રીજીની જન્મજયંતિ નિમિત્તે તાપી જિલ્લામાં ‘માનવતા જાગૃત ટ્રસ્ટ’ દ્વારા એક ઉત્કૃષ્ટ અને સરાહનીય સેવાકીય પ્રવૃત્તિનું આયોજન કરવામાં આવ્યું હતું.
ટ્રસ્ટના અધ્યક્ષ શ્રી ભરતભાઈ લીંબાચીયાના માર્ગદર્શન હેઠળ એક નિરાધાર પરિવારને જીવનજરૂરી રાશન કિટનું વિતરણ કરવામાં આવ્યું હતું. આટલું જ નહીં, પરિવારની આર્થિક અને સામાજિક પરિસ્થિતિને ધ્યાનમાં રાખીને ટ્રસ્ટ દ્વારા તેમને નવું ઘર બનાવી આપવાની પણ ખાતરી આપવામાં આવી હતી. ટ્રસ્ટની આ પહેલથી નિરાધાર પરિવારના જીવનમાં આશાનો નવો સંચાર થયો છે.
મહાત્મા ગાંધીજીના સત્ય, અહિંસા અને સેવાભાવના વિચારો તેમજ લાલ બહાદુર શાસ્ત્રીજીના સાદગી અને કર્તવ્યનિષ્ઠાના આદર્શોને સાર્થક કરતા આ સેવાકાર્યથી સમાજમાં માનવતા અને સહકારની ભાવના વધુ મજબૂત બની છે.
“સેવા એ જ સાચો ધર્મ અને માનવતા એ જ સાચી ઓળખ” ના સૂત્રને ચરિતાર્થ કરતા માનવતા જાગૃત ટ્રસ્ટે તાપી જિલ્લામાં માનવતાનું ઉત્તમ ઉદાહરણ પૂરું પાડ્યું છે.
