વાહ તંત્ર વાહ ઇડરના મોહનપુરા સરકારી જમીન પરથી દબાણ દૂર કરાયું છતાં વિસામાના ઠેકાણા નથી દબાણ હટાવ્યું, પણ વિસામો બનાવ્યો નહીં,

ઈડર તાલુકાના મોહનપુરા ગામની સીમમાં અંબાજી જતા પદયાત્રીઓ માટે વિસામો ઉભો કરવાના હેતુથી તંત્ર દ્વારા થોડા દિવસો અગાઉ કરોડોની સરકારી જમીન પરથી દબાણ દૂર કરવામાં આવ્યું હતું. પરંતુ હાલ ભાદરવી પૂનમના આરે મોટી સંખ્યામાં પદયાત્રીઓ અંબાજી તરફ પ્રયાણ કરી રહ્યા છે, ત્યારે જમીન ખાલી કરાવ્યા બાદ પણ તંત્ર દ્વારા અહીં વિસામાની કોઈ કામગીરી શરૂ ન કરાતાં સ્થાનિકો અને શ્રદ્ધાળુઓમાં ભારે રોષ જોવા મળી રહ્યો છે. તંત્રની આ ઢીલી નીતિને કારણે લોકો હવે તેની કામગીરી પર શંકા વ્યક્ત કરી રહ્યા છે.

દબાણ દૂર કરવા મામલતદાર અને પોલીસ કાફલો દોડ્યો, પણ પછી તંત્ર ઊંઘી ગયું

મળતી માહિતી મુજબ, ઈડર-ખેડબ્રહ્મા માર્ગ પરથી પસાર થતા હજારો પદયાત્રીઓની સુવિધા માટે વહીવટી તંત્ર દ્વારા ગત તા. ૧ સપ્ટેમ્બરે મામલતદારની આગેવાની હેઠળ અને કડક પોલીસ બંદોબસ્ત સાથે મોહનપુરાની સીમમાં આવેલી સર્વે નંબર ૫૪૭ની સરકારી પડતર જમીન ખુલ્લી કરાવવામાં આવી હતી. વર્ષો જૂનું દબાણ હટાવ્યા બાદ શ્રદ્ધાળુઓમાં આશા જાગી હતી કે અહીં વિસામાની તમામ સુવિધાઓ ઉપલબ્ધ થશે. પરંતુ દબાણ હટાવ્યા બાદ તંત્રની કામગીરી જાણે ત્યાં જ અટકી ગઈ છે.

છાંયડો, બેસવાની કે પીવાના પાણીની કોઈ સગવડ નથી

અંબાજી જવા માટે ઈડર-ખેડબ્રહ્મા હાઈવે અત્યંત મહત્વપૂર્ણ છે. ભાદરવી પૂનમ નિમિત્તે પદયાત્રા કરતા મહિલાઓ, વૃદ્ધો અને બાળકોને રસ્તામાં આરામ મળી રહે તે માટે આ વિસામો અનિવાર્ય હતો. પરંતુ હાલ આ જગ્યા માત્ર ખુલ્લું મેદાન બનીને રહી ગઈ છે. અહીં શ્રદ્ધાળુઓ માટે:

• નથી બેસવાની કોઈ વ્યવસ્થા

• નથી છાંયડાની છત કે મંડપ

• નથી પીવાના શુદ્ધ પાણીની સુવિધા

• નથી રાત્રિ રોકાણ માટેની કોઈ વ્યવસ્થા

“જો વિસામો બનાવવો નહોતો તો દબાણ હટાવવાનો અર્થ શું?” – સ્થાનિકોનો આક્રોશ

દબાણ દૂર કરવા માટે તાત્કાલિક ધોરણે તત્પરતા દાખવનાર તંત્ર હવે પદયાત્રીઓની સુવિધા ઉભી કરવામાં શા માટે વિલંબ કરી રહ્યું છે તે મોટો પ્રશ્ન છે. સ્થાનિકો ચર્ચા કરી રહ્યા છે કે જો સમયસર સુવિધા જ ઉભી ન કરવી હતી તો દબાણ હટાવવાનો પદયાત્રીઓને શો ફાયદો થયો?

આ સંજોગોમાં મોહનપુરા ખાતે ખુલ્લી કરાયેલી જમીન પર તાત્કાલિક ધોરણે શેડ, પીવાનું પાણી અને બેસવાની અસ્થાઈ સુવિધાઓ ઉભી કરી વિસામા સ્થળ કાર્યરત કરવામાં આવે તેવી લોકમાંગ બુલંદ બની છે.