હિંમતનગર શહેરમાં HIV અને એઈડ્સ જેવા ગંભીર રોગો અંગે સમાજમાં જાગૃતિ લાવવા અને લોકોમાં ફેલાયેલી ગેરમાન્યતાઓ દૂર કરવાના ઉદ્દેશ્યથી એક વિશેષ જાગૃતિ રેલીનું આયોજન કરવામાં આવ્યું હતું. જિલ્લા ક્ષય કેન્દ્ર, હિંમતનગર અને સરપ્રતાપ નર્સિંગ કોલેજના સંયુક્ત ઉપક્રમે આયોજિત આ રેલીમાં નર્સિંગ કોલેજના મોટી સંખ્યામાં વિદ્યાર્થીઓએ ઉત્સાહભેર ભાગ લીધો હતો.
આ રેલીનો પ્રારંભ જૂની સિવિલ હોસ્પિટલ ખાતેથી કરવામાં આવ્યો હતો. નર્સિંગના વિદ્યાર્થીઓ હાથમાં જાગૃતિ ફેલાવતા વિવિધ બેનરો, પ્લેકાર્ડ્સ અને સૂત્રોચ્ચાર સાથે રસ્તા પર ઉતર્યા હતા. આ રેલી શહેરના મુખ્ય માર્ગો જેવા કે બી ડિવિઝન પોલીસ સ્ટેશન અને ટાવર ચોક પરથી પસાર થઈને લોકોને HIV અને એઈડ્સ સામે રક્ષણ, જરૂરી સાવચેતીઓ તેમજ રોગ અંગેની સાચી માહિતી મેળવવા માટે પ્રેરિત કર્યા હતા. ત્યારબાદ રેલી પરત જૂની સિવિલ હોસ્પિટલ ખાતે પહોંચી પૂર્ણ થઈ હતી.
કાર્યક્રમ અંગે માહિતી આપતા જિલ્લા ટીબી એચઆઇવી ઓફિસર ડૉ. ફાલ્ગુનીબેને જણાવ્યું હતું કે, “આ રેલીનો મુખ્ય હેતુ લોકોમાં HIV અને એઈડ્સ પ્રત્યે જાગૃતિ વધારવાનો તેમજ આ રોગને લઈને સમાજમાં પ્રવર્તતી ગેરમાન્યતાઓ દૂર કરવાનો છે. નર્સિંગ વિદ્યાર્થીઓએ રેલીના માધ્યમથી લોકોને સાવચેત રહેવા અને સાચી માહિતી અપનાવવા ખાસ અપીલ કરી છે.”
વિદ્યાર્થીઓના આ સરાહનીય પ્રયાસથી શહેરમાં સ્વાસ્થ્ય જાગૃતિનો સકારાત્મક સંદેશો પહોંચ્યો છે.
