ઈડર ખાતે વીરાવાલા પરિવાર (લીલછા) દ્વારા ભવ્ય સ્નેહ મિલન યોજાયો: ૫ પેઢીના ૧૫૩ ગામોની ૧૮૦ દીકરીઓનું તાંબાના કળશથી બહુમાન
ઈડર-વિજયનગર ત્રણ રસ્તા પાસે આવેલી પ્રયાગ કોલેજ ખાતે લીલછા નિવાસી વીરાવાલા પરિવારના સ્વજન અને રિટાયર્ડ ડીન ડૉ. પ્રો. ગોવિંદભાઇ મસાલના માર્ગદર્શન હેઠળ ‘વસુધૈવ કુટુંબકમ્’ની ઉત્કૃષ્ટ ભાવનાને સાર્થક કરતો એક ભવ્ય અને લાગણીસભર સ્નેહ મિલન કાર્યક્રમ યોજાઈ ગયો.
આ સ્નેહ મિલન સમારોહમાં વીરાવાલા પરિવારની પાંચ પેઢીના સભ્યો સહિત ૧૫૩ જેટલાં જુદા જુદા ગામોમાંથી પધારેલી પરિવારની ૧૮૦ દીકરીઓ અને તેમના પરિવારોએ ઉત્સાહભેર હાજરી આપી હતી.
સમાજ સુધારણા અને સન્માનનો અનોખો સંગમ આધુનિક વિજ્ઞાન અને ટેક્નોલોજીના યુગમાં દરેક સ્વજન આર્થિક અને સામાજિક રીતે પ્રગતિ કરે તેમજ પરસ્પર સ્નેહ અને હેતના સંબંધોથી જોડાયેલો રહે તેવા ઉદ્દેશ્ય સાથે આ આયોજન કરાયું હતું. કાર્યક્રમ દરમિયાન:
-
સમાજમાંથી અંધશ્રદ્ધા અને કુરિવાજોને તિલાંજલિ આપવા આહ્વાન કરાયું.
-
વ્યસનમુક્ત, સુદ્રઢ અને તંદુરસ્ત સમાજની રચના કરી શૈક્ષણિક અને આર્થિક વિકાસ સાધવા પર ભાર મૂકાયો.
-
૧૫૩ ગામથી ઉપસ્થિત રહેલી પરિવારની ૧૮૦ દીકરીઓનું તાંબાનો કળશ ભેટ આપીને વિશેષ બહુમાન કરવામાં આવ્યું.
પારિવારિક સંબંધો વધુ મજબૂત બન્યા ભાગદોડ ભરેલી આધુનિક દિનચર્યા વચ્ચે સગા-સંબંધીઓ એકબીજાને મળે અને પારિવારિક સંબંધો વધુ દ્રઢ બને તે માટે વીરાવાલા પરિવાર (લીલછા) દ્વારા કરવામાં આવેલો આ પ્રયાસ ખૂબ જ સરાહનીય રહ્યો હતો. આ પ્રસંગે વિવિધ પરગણાના અગ્રણીઓ તેમજ પાંચેય પેઢીના અબાલ-વૃદ્ધ સૌ પરિજનોએ એકઠા થઈને સ્નેહની આપ-લે કરી હતી.
સમગ્ર સફળ કાર્યક્રમનું સંચાલન રિટાયર્ડ પીએસઆઈ પ્રવીણભાઈ સોલંકી, જગદીશભાઈ અને વસંતભાઈ દ્વારા ડૉ. પ્રો. ગોવિંદભાઇ મસાલના કુશળ માર્ગદર્શન હેઠળ સુચારૂ રૂપે કરવામાં આવ્યું હતું.
