અંબાજી પદયાત્રીઓ અને હાઈવે સલામતી સામે સ્થાનિકોના ‘શોર્ટકટ’નું જોખમ: ગાર્ડ રેલ સાથે ચેડાં થતાં પોલીસ ફરિયાદ

અંબાજી તરફ જતા લાખો પદયાત્રીઓ અને હાઈવે પરથી પસાર થતા વાહનચાલકોની સુરક્ષા માટે રાષ્ટ્રીય ધોરીમાર્ગ પર ઊભી કરવામાં આવેલી સલામતી વ્યવસ્થા સામે સ્થાનિકોની બેદરકારી ભારે પડી રહી છે. ઈડર તાલુકાના કાનપુર-રેવાસ ગામ નજીકથી પસાર થતાં રાષ્ટ્રીય ધોરીમાર્ગ નં. 168-જી પર મુખ્ય રોડ અને સર્વિસ રોડ વચ્ચે મૂકવામાં આવેલી ‘પેડેસ્ટ્રીયન ગાર્ડ રેલ’ને કાપીને અનધિકૃત શોર્ટકટ બનાવવામાં આવતા મોટું અકસ્માતનું જોખમ ઊભું થયું છે. આ ગંભીર બાબત ધ્યાન પર આવતા રાષ્ટ્રીય ધોરીમાર્ગ પેટા વિભાગના નાયબ કાર્યપાલક ઈજનેરે ઈડર પોલીસ સ્ટેશનમાં લેખિત જાણ કરી કાયદેસરની કાર્યવાહીની માગ કરી છે.

મુખ્ય મુદ્દાઓ અને ઘટનાની ગંભીરતા

• સલામતી વ્યવસ્થા સાથે ચેડાં: કાનપુર અને રેવાસ ગામ વિસ્તારમાં બડોલી-ભિલોડા-શામળાજી માર્ગના નવીનીકરણ અંતર્ગત સર્વિસ રોડ અને મિડિયન ગેપ બનાવવામાં આવ્યા છે. પદયાત્રીઓ કે અન્ય વાહનો સીધા મુખ્ય માર્ગ પર આવીને અકસ્માતનો ભોગ ન બને તે માટે લોખંડની ગાર્ડ રેલ લગાવવામાં આવી હતી. જોકે, સ્થાનિકોએ પોતાના સ્વાર્થ માટે આ ગાર્ડ રેલમાં કટ મારીને ગેરકાયદે રસ્તા બનાવી લીધા છે.

• 80 થી 100 કિમીની સ્પીડ પર અકસ્માતનો ભય: આ રાષ્ટ્રીય ધોરીમાર્ગ પર વાહનોની ડિઝાઈન સ્પીડ 80થી 100 કિમી પ્રતિ કલાકની છે. આવી વાહન ઝડપ વચ્ચે જો કટ મારેલી રેલિંગમાંથી અચાનક કોઈ વ્યક્તિ કે વાહન હાઈવે પર આવી જાય, તો ગંભીર કે પ્રાણઘાતક અકસ્માત સર્જાવાની પૂરેપૂરી શક્યતા છે.

• તંત્ર દ્વારા પોલીસને પુરાવા સાથે અપીલ: નાયબ કાર્યપાલક ઈજનેર (ઈડર પેટા વિભાગ) દ્વારા હાઈવે પર ક્ષતિગ્રસ્ત કરાયેલી ગાર્ડ રેલના ફોટોગ્રાફ્સ સાથે ઈડર પોલીસને પત્ર પાઠવવામાં આવ્યો છે. તંત્રએ ગાર્ડ રેલ કાપીને થતી અનધિકૃત અવરજવર તુરંત રોકવા અને સ્થાનિકોમાં માર્ગ સલામતી અંગે જાગૃતિ લાવવા પોલીસને વિનંતી કરી છે.

નિયત મિડિયન ગેપનો ઉપયોગ કરવા તંત્રની અપીલ

માર્ગ મકાન વિભાગે સ્પષ્ટ કર્યું છે કે આ ગાર્ડ રેલિંગ કોઈનો રસ્તો રોકવા માટે નહીં, પરંતુ અચાનક થતા અકસ્માતો અટકાવી લોકોના જીવ બચાવવા માટે છે. ખાસ કરીને અંબાજી ભાદરવી પૂનમના મેળા અંતર્ગત પદયાત્રીઓની ભારે અવરજવર હોય ત્યારે આ સુરક્ષા અતિ મહત્વની બની રહે છે. સ્થાનિકોએ ગાર્ડ રેલિંગને નુકસાન પહોંચાડવાને બદલે સરકાર દ્વારા બનાવવામાં આવેલા અધિકૃત સર્વિસ રોડ અને મિડિયન ગેપનો જ ઉપયોગ કરવો જોઈએ.