ઈડર APMC ચૂંટણી: ભાજપમાં અસંતોષ બાદ ત્રિપાંખિયો જંગ, ૯ સપ્ટેમ્બરે મતદાન

ઈડર ખેતીવાડી ઉત્પન્ન બજાર સમિતિ (APMC) ની આગામી ૯ સપ્ટેમ્બરે યોજાનારી ચૂંટણીને લાઈને ઈડર તાલુકાના સહકારી રાજકારણમાં ગરમાવો ચરમસીમાએ પહોંચ્યો છે. ફોર્મ પરત ખેંચવાના અંતિમ દિવસે ભાજપ દ્વારા મેન્ડેટની જાહેરાત કરાતાં જ સપાટી પર આવેલા અસંતોષ વચ્ચે હવે ૩૬ ઉમેદવારો સાથે ત્રણ પેનલો વચ્ચે ત્રિપાંખિયો ચૂંટણી જંગ જામશે.

ચૂંટણીનું આંકડાકીય અને રાજકીય ચિત્ર

• કુલ ફોર્મ: જાહેરનામું બહાર પડ્યા બાદ પ્રારંભમાં અંદાજે ૧૪૧ ફોર્મ ભરાયા હતા, જેમાંથી સમજાવટ બાદ કેટલાક ઉમેદવારોએ નામો પાછા ખેંચ્યા હતા.

• હાલ સ્થિતિ: ખેડૂત વિભાગમાંથી ૩૬ અને વેપારી વિભાગમાંથી ૭ ઉમેદવારો મેદાનમાં છે.

• નવી પેનલનું સમર્થન: સતિષ પટેલની આગેવાની હેઠળની નવી ‘ખેડૂત એકતા પેનલ’ને જુમસર, રેવાસ, દેશોતર અને સિંગા સેવા મંડળીનું સમર્થન સાંપડ્યું છે.

મુખ્ય ત્રણ પેનલોના ઉમેદવારોની યાદી

બળવા પાછળનું મુખ્ય કારણ

ઈડર APMC માં ભાજપ દ્વારા મેન્ડેટ આપવાની પ્રથા સામે અસંતોષ ઊભો થયો હતો. પક્ષ તરફથી મેન્ડેટ ન મળતાં સાબરકાંઠા બેંકના ડિરેક્ટર સતિષ પટેલની આગેવાનીમાં ભાજપ વિચારસરણી ધરાવતા સહકારી અગ્રણીઓએ અલગ ચોકો રચી ‘ખેડૂત એકતા પેનલ’ ઉતારી છે.

હવે ત્રણેય પેનલો દ્વારા મતદારોનો સંપર્ક અને પ્રચાર તેજ કરવામાં આવ્યો છે. છેલ્લી ઘડીએ બનેલી આ નવી પેનલ અને ‘ખેડૂત વિકાસ પેનલ’ની હાજરીથી ભાજપ પ્રેરિત પેનલના મતોનું ધ્રુવીકરણ કોના તરફ નમે છે તેના પર જીત-હારનો આધાર રહેશે.