રૂ. ૪.૫૦ લાખની લોન ન ભરવી પડે તે માટે IIFL બેંક મેનેજરની ઘાતકી હત્યા: પ્રેમી-પ્રેમિકાના કાવતરાનો પર્દાફાશ
પ્રાંતિજના વડવાસા નજીક બનેલી IIFL બેંકના મેનેજર ભરતભાઈ ચૌધરીની સનસનીખેજ હત્યાનો સાબરકાંઠા પોલીસે પર્દાફાશ કર્યો છે. આશરે રૂ. ૪.૫૦ લાખની બેંક લોન પરત ન ચૂકવવી પડે તે માટે પ્રેમી-પ્રેમિકાએ કાવતરું રચીને બેંક મેનેજરની તીક્ષ્ણ હથિયારના ઘા ઝીંકીને નિર્મમ હત્યા કરી હોવાનું પોલીસ તપાસમાં સામે આવ્યું છે.
હત્યાનો આખો ઘટનાક્રમ:
પોલીસ દ્વારા આપવામાં આવેલી માહિતી મુજબ, ૨ સપ્ટેમ્બરે માણસા સ્થિત IIFL બેંકના મેનેજર ભરતભાઈ ચૌધરીને મુખ્ય આરોપી યોગેશ ઠાકોર પોતાની સાથે સફેદ રંગની વર્ના કારમાં માણસાથી લઈને નીકળ્યો હતો. ત્યાંથી પ્રાંતિજ પહોંચીને અન્ય સહ-આરોપી મહિલા ભાવનાબેન ઉર્ફે ભાવુ ઠાકોરને સાથે લીધા હતા.
ત્યારબાદ ત્રણેય જણા વડવાસા પેટ્રોલ પંપ નજીક પહોંચ્યા હતા, જ્યાં તકનો લાભ લઈને આરોપીઓએ ભરતભાઈ ચૌધરી પર તીક્ષ્ણ હથિયાર વડે ગંભીર હુમલો કરી તેમને મોતને ઘાટ ઉતાર્યા હતા.
લાશનો નિકાલ કરવા જતા કાર ખાડામાં ફસાઈ:
હત્યા બાદ બંને આરોપીઓ મૃતદેહને વર્ના કારમાં મૂકીને તેનો નિકાલ કરવા જઈ રહ્યા હતા. જોકે, રસ્તામાં કાર રિવર્સ લેતી વખતે એક ખાડામાં ફસાઈ ગઈ હતી. કાર બહાર કાઢવાના તમામ પ્રયાસો નિષ્ફળ જતાં બંને આરોપીઓ કાર અને મૃતદેહને ઘટનાસ્થળે જ છોડીને ફરાર થઈ ગયા હતા.
પોલીસ કાર્યવાહી અને તપાસ:
હિંમતનગર DySP એ. કે. પટેલના જણાવ્યા મુજબ, તપાસ દરમિયાન સામે આવ્યું છે કે આરોપીઓએ IIFL માંથી આશરે રૂ. ૪.૫૦ લાખની લોન લીધી હતી. આ લોન ચૂકવવી ન પડે તે માટે જ આ હત્યાનું કાવતરું રચવામાં આવ્યું હતું.
પોલીસે આ કેસમાં પ્રાંતિજ ખાતેથી મહિલા આરોપી ભાવનાબેન ઉર્ફે ભાવુ રોહિતજી ઠાકોરની અટકાયત કરી છે, જ્યારે મુખ્ય આરોપી યોગેશજી ઠાકોરને ઝડપી પાડવા માટે આગળની કાયદેસરની તજવીજ હાથ ધરી છે.
