સાબરકાંઠા લોકલ ક્રાઇમ બ્રાન્ચ (LCB) દ્વારા પશુચોરી, પશુઓ પ્રત્યે ક્રૂરતા અને ગૌવંશ સંબંધિત ગંભીર ગુનાઓમાં સંડોવાયેલા કુખ્યાત **‘બિલાલ બટકો ગેંગ’**ના કુલ 8 સભ્યો સામે ગુજરાત કંટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ (GUJCTOC) Act-2015 હેઠળ કડક કાર્યવાહી હાથ ધરવામાં આવી છે.
પોલીસના જણાવ્યા મુજબ આ ગેંગ છેલ્લા લગભગ 10 વર્ષથી સાબરકાંઠા ઉપરાંત અરવલ્લી, ખેડા અને અમદાવાદ સહિત વિવિધ જિલ્લાઓમાં પશુચોરી, ગૌવંશ સંબંધિત ગુનાઓ અને પશુઓ પ્રત્યે ક્રૂરતા આચરી રહી હતી. ગેંગની પ્રવૃત્તિઓના કારણે પશુપાલકો અને ખેડૂતોમાં ભયનું વાતાવરણ સર્જાયું હતું.
આ કાર્યવાહી નાયબ પોલીસ મહાનિરીક્ષક વીરેન્દ્રસિંહ યાદવ (IPS) અને સાબરકાંઠાના પોલીસ અધિક્ષક ડૉ. પાર્થરાજસિંહ ગોહિલ (IPS)ના માર્ગદર્શન હેઠળ LCB અને SOGની ટીમે સતત દેખરેખ અને તપાસ બાદ હાથ ધરી હતી.
ગેંગના મુખ્ય આરોપીઓ
પોલીસે મહંમદ બિલાલ ઉર્ફે સમીર ઉર્ફે બટકો, ઇકબાલહુસેન સૈયદ, ઇરફાન ઉર્ફે ટોલી, સાહિલખાન પઠાણ, આરીફ ઉર્ફે કાલુ, સદ્દામખાન પઠાણ, મુસ્તકીમ ઉર્ફે ખચકો અને સંજયકુમાર દેવીપૂજક સહિત કુલ 8 સભ્યો સામે GUJCTOC હેઠળ કાર્યવાહી નોંધાવી છે.
અનેક જિલ્લાઓમાં ગુનાઓનો ઇતિહાસ
તપાસમાં સામે આવ્યું છે કે ગેંગના સભ્યો સામે અમદાવાદ, સાબરકાંઠા, અરવલ્લી અને ખેડા જિલ્લામાં પશુચોરી, પશુઓની હત્યા, ગૌમાંસ વેચાણ, પશુઓ પ્રત્યે ક્રૂરતા અને અન્ય ગંભીર ગુનાઓના અનેક કેસ નોંધાયેલા છે. અનેક બનાવોમાં ભેંસો અને ગૌવંશની ચોરી કરીને વાહનોમાં અમાનવીય રીતે ભરવામાં આવ્યા હતા, જેના કારણે પશુઓના મોત પણ થયા હતા.
પોલીસનું કહેવું છે કે સંગઠિત ગુનાહિત પ્રવૃત્તિઓ પર અસરકારક અંકુશ મેળવવા અને ભવિષ્યમાં આવા ગુનાઓને રોકવા માટે GUJCTOC હેઠળની આ કાર્યવાહી મહત્વપૂર્ણ સાબિત થશે.
