પોશીના તાલુકાના લાંબડિયા મુકામે આગામી ૧૫મી ઓગસ્ટ, સ્વતંત્રતા દિવસની પૂર્વ તૈયારીના ભાગરૂપે આજે તારીખ ૧૩ ઓગસ્ટના રોજ ભારતીય જનતા પાર્ટી (B.J.P) દ્વારા એક તિરંગા રેલીનું આયોજન કરવામાં આવ્યું હતું. આ રેલી પારસ હાઈસ્કૂલથી શરૂ થઈને લાંબડિયા ગામમાં ફરી હતી.
રેલીની શરૂઆતમાં પોલીસ વિભાગના જવાનો હાથમાં તિરંગા ધ્વજ લઈને મોખરે રહ્યા હતા, જ્યારે પાછળ શાળાના વિદ્યાર્થીઓ પણ મોટી સંખ્યામાં જોડાયા હતા. ત્યારબાદ પક્ષના સ્થાનિક અગ્રણીઓ અને કાર્યકરોએ પણ તિરંગા ધ્વજ સાથે રેલીમાં ઉત્સાહભેર ભાગ લીધો હતો. ગ્રામજનો પણ મોટી સંખ્યામાં આ રેલીમાં જોડાઈને દેશભક્તિનો માહોલ સર્જ્યો હતો.
આ પ્રસંગે ઉપસ્થિત અગ્રણીઓએ આગામી સ્વતંત્રતા દિવસની ઉજવણી ઉત્સાહભેર કરવા તથા “હર ઘર તિરંગા” અભિયાનમાં વધુમાં વધુ લોકોને જોડાવા અપીલ કરી હતી. રેલી દરમિયાન સમગ્ર માર્ગ પર દેશભક્તિના સૂત્રોચ્ચાર સાથે ઉત્સાહપૂર્ણ વાતાવરણ જોવા મળ્યું હતું.
