ઈડરના લાલોડા રોડ પર વરસાદી પાણી ભરાતાં ભારે હાલાકી: કુબેર પ્લાઝા નજીક રસ્તો બિસ્માર, તંત્ર મુકપ્રેક્ષક

ઈડરના લાલોડા રોડ પર વરસાદી પાણી ભરાતાં ભારે હાલાકી: કુબેર પ્લાઝા નજીક રસ્તો બિસ્માર, તંત્ર મુકપ્રેક્ષક

• સિવિલ હોસ્પિટલ જવાના મુખ્ય માર્ગ પર કાદવ-કીચડ અને ખાડાનું સામ્રાજ્ય

• સ્થાનિક દુકાનદારો દ્વારા રેતી-માટીના ઢગલા કરી પાણીનો પ્રવાહ રોકાયાનો આક્ષેપ

• બંધ સ્ટ્રીટલાઈટના કારણે રાત્રિના સમયે ભારે અકસ્માતની ભયંકર શક્યતા

ઈડર: ઈડર તાલુકાના લાલોડા રોડ પર આવેલા કુબેર પ્લાઝા નજીક વરસાદી પાણીના નિકાલની યોગ્ય વ્યવસ્થા ન હોવાના કારણે જાહેર માર્ગ પર ભારે જળબંબાકાર અને કાદવ-કીચડની સ્થિતિ સર્જાઈ છે. આ રસ્તો લાલોડા ગામ તથા સ્થાનિક સિવિલ હોસ્પિટલ તરફ જતો મુખ્ય માર્ગ હોવાથી રોજના સેંકડો દર્દીઓ, વાહનચાલકો અને સ્થાનિક રહીશોને ભારે હાલાકી ભોગવવી પડી રહી છે.

રેતી-માટી નાખી પાણીનો પ્રવાહ અવરોધવાનો આક્ષેપ સ્થાનિક લોકોના જણાવ્યા મુજબ, કુબેર પ્લાઝાના કેટલાક દુકાનદારો દ્વારા રસ્તાની બાજુમાં રેતી અને માટીના મોટા ઢગલા ખડકી દેવામાં આવ્યા છે. જેના કારણે વરસાદી પાણીનો કુદરતી નિકાલ અટકી ગયો છે અને પાણી માર્ગ પર જ ભરાઈ રહે છે. સતત પાણી ભરાઈ રહેવાના કારણે ડામરનો રોડ તૂટી ગયો છે અને મોટા-મોટા ખાડા પડી ગયા છે.

સ્ટ્રીટલાઈટો બંધ હોવાથી અકસ્માતનો ભય કુબેર પ્લાઝા વિસ્તારમાં સ્ટ્રીટલાઈટો પણ લાંબા સમયથી બંધ હાલતમાં છે. રાત્રિના સમયે અંધારામાં કાદવ-કીચડ અને પાણીથી ભરેલા ખાડા ન દેખાતા હોવાથી દ્વિચક્રી વાહનચાલકો સ્લીપ થઈ જવાના અને નાના-મોટા અકસ્માતો થવાનું જોખમ ખૂબ વધી ગયું છે.

તંત્રની નિષ્ક્રિયતા સામે જનરોષ તારીખ ૦૧/૦૮/૨૦૨૬ના રોજ લેવાયેલા ફોટોગ્રાફિક પુરાવા સાથે સ્થાનિકોએ અગાઉ ઈડર નગરપાલિકા, સાબરકાંઠા કલેક્ટર, નાયબ કલેક્ટર અને મામલતદાર કચેરી સુધી લેખિત તથા મૌખિક રજૂઆતો કરી હતી. તેમ છતાં, તંત્ર દ્વારા માત્ર સ્થળ પર આવીને સર્વે કરવાનો દેખાડો જ કરવામાં આવ્યો છે, કોઈ નક્કર કાર્યવાહી કરવામાં આવી નથી.

લોકોમાં એવી પણ ચર્ચા ચાલી રહી છે કે કેટલાક દુકાનદારો સરકારી કર્મચારીઓ સાથે પહોંચ ધરાવતા હોવાનો દાવો કરીને કાર્યવાહીથી બચી રહ્યા છે. આ બાબતે તંત્ર દ્વારા નિષ્પક્ષ તપાસ કરી સત્ય બહાર લાવવું જરૂરી બન્યું છે.

સ્થાનિકોની મુખ્ય માંગણીઓ:

• કુબેર પ્લાઝા વિસ્તારમાં વરસાદી પાણીના નિકાલ માટે તાત્કાલિક ડ્રેનેજ/ગટરની સફાઈ કરવામાં આવે.

• જાહેર માર્ગ પરથી રેતી, માટી અને કપચીના તમામ ગેરકાયદેસર અવરોધો દૂર કરવામાં આવે.

• બંધ પડેલી સ્ટ્રીટલાઈટો તાત્કાલિક ચાલુ કરવામાં આવે.

• બિસ્માર બનેલા રોડનું સત્વરે સમારકામ કરવામાં આવે.

હવે ઈડર નગરપાલિકા અને સંબંધિત તંત્ર આ ગંભીર સમસ્યા પ્રત્યે ધ્યાન આપીને કાયમી ઉકેલ લાવશે કે પછી લોકોની હાલાકી આમ જ ચાલુ રહેશે, તે જોવું રહ્યું.